উকা পাতত উল্কাপাত
জীৱনৰো একেই বাট...
~যান্ত্ৰিক~
আহিছিল বান
তিতিছিল ধান
লাগিলে ভেঁকুৰ
বাছিলে মাগুৰ
জিলিৰ চিঞৰেই গান।
'ডিজেল'ৰ ভৰত ৰাওনা হয়
সপোনমুখী 'ট্ৰেভেলাৰ'
৯ বজাৰ সপোনত
আহে যায়, কি কাৰ?
যান্ত্ৰিকতাৰ দোৱাতত...
ভাল হ'ল ডুবিলি।
বৈঠা বাই ভাগৰি...
ভালেই হʼল হাৰিলি!
যন্ত্ৰণাত ককবকাই
এটা যে আছিল সাধু...
যান্ত্ৰিকতাৰ উৎফুল্লতাত
এয়াতো আজিৰ সাধু।
আহিব বান
নিতিতে ধান
নালাগে ভেঁকুৰ
বাছক মাগুৰ
জীৱন ভীন্নসুৰী গান।
কাৰ কি লাভ?
হ'বলগীয়া কি আছিল, যি নহʼল।
হʼবলগীয়া যি নাছিল, যি হৈ গʼল...
ভাবি, কাৰ কি লাভ?
পাবলগীয়া যি নাছিল, যি পোৱা গ'ল?
পাবলগীয়া কি আছিল, যি পোৱা নহʼল...
অনুশোচনাত আছে কিবা লাভ?
বিদ্যালয়ৰ সপোন চাকৰি
চাকৰিৰ সপোন সময়।
সময়হীনতাৰ সময়ত নোপোৱাবোৰ বিচাৰি
স্মৃতিত কিবা লাভ?
প্ৰেমহীনতাৰ সময়ত তুমি
তোমাৰ সময়ত দায়িত্ববোধ।
তুমিহীনতাৰ সময়ত তোমাকেই বিচাৰি
আছে জানোঁ লাভ?
'আছে-নাই'ৰ সমিকৰণেই জীৱন!
বন্ধু, টকা, সময়, প্ৰেম...
ইত্যাদি ইত্যাদি।
এটা আছে, এটা নাই;
আজি আছে, কালি নাই।
ভাবি কি লাভ?
আশাৰ ভুঁইত স্মৃতি খুঁচৰি
মোৰ পিছে বহু লাভ...
~ৰংদেউ হেৰাল ৰংপুৰত~
বগলীৰ খোপনিত মাছৰ দুখ...
গাহৰিৰ বাগৰত পোৱালিৰ।
খুপি খুপি এটি এটিকৈ শেষ কৰাৰ চেষ্টাত
বাগৰি আহিছিল নতুন মুখ।
ৰং আছিল ৰংপুৰত!
সকলো কাহিনী লিখা নাযায়।
বাগৰি অহা সাধু এটিৰ দৰে বাগৰ সলাই কʼবলৈ,
বতাহজাক নৰʼল!
কথা নাছিল নহাৰ; কথা আছিল থকাৰ।
লিখা হোৱা নাছিল সপোনবোৰ, কাৰো...কʼতো।
মাৰ্বল গুটিটোৰ দৰে নিলিখাকৈয়ে বাগৰা ৰংবোৰ...
শৈশৱৰ 'পিলু' খেলতোছোন গাততেই সোমাইছিল!
সেই গাত আছিল প্ৰত্যাশিত; আৰু এই?
সপোনবোৰ পুৰঠ হৈ জেদী হয় বুলি কʼবলৈ
থাকি গৈছিল হেনো আইতাৰ!
সাধুবোৰ আছিল তেতিয়া কুমলীয়া কুঁহিপাত...
আৰু এতিয়া?
~সময়~
ধৰাবন্ধা নিয়ম এটাত চলে সময়
কেলেণ্ডাৰ নাইবা ঘড়ীত।
কেলেণ্ডাৰৰ ৰঙা দিনবোৰ গোলাপী
জীৱনৰ 'ৱাইড বল'ত নিয়ম মিছা।
ঘড়ীৰ কাঁইটবোৰ হিচাপী
অস্থাৱৰ সপোনে নেৰে পিছা।
সময়....
'ৰিৱাইণ্ড' কৰি চাব পৰা এখনি ছবি
'কমেডী' নাইবা 'ট্ৰেজেদী'...
সলোৱাৰ অৱকাশ বৃথা।
কেলেণ্ডাৰৰ লেমিনেটেড সময়বোৰ
শুকান সৰাপাতৰ দৰেই ঠুনুকা।
পমা গুটিৰ চিটিকনিত হেৰায় সময়!
লুকা-ভাকুৰ এন্ধাৰত জিৰায় সময়!
খেলপথাৰৰ পৰা ম'বাইল স্ক্ৰীণলৈ...
দিয়াচলাইৰ দৰৰ দৰে লেহেম নহয়।
জুবুৰ মাৰি দোৱাতত , সপোন মচাৰ হেঁপাহ।
বেলিঘড়ীৰ সাধুবোৰ,
ফাগুণৰ ধৈৰ্যহীন ৰংবোৰ,
শিশু এটিৰ দৰে সৰল নহয়।
~এলাৰ্ম ঘড়ী~
'দায়িত্ববোধ'ৰ উৎপত্তি হৈছিল নেকি'
শিৰোনাম'ৰ পৰা?
এই যে ৫ বজাৰ প্ৰশ্নবোৰৰ উত্তৰ নাথাকে
কুকুৰাৰ ডাকত নাছিল নেকি ব্যস্ততা?
অস্ত-উদয়ৰ তালিকা...এলেহুৱা।
গতি আছে, গতি নাই
সপোন আছে, সময় নাই
সময় আছে, তুমি নাই।
শৈশৱৰ যুঁৱলিত মই কাগজৰ নাও ...
আৰু তুমি?
৫ বজাৰ কেৰাচিন!
বৰষুণৰ হেঁপাহত ছাই হোৱাৰ প্ৰস্তুতি
পাহৰা হʼয় খেজুৰ বুটলা বাট...
এদিন গৈ চাম, ৰৈ চাম।
কৈ চাম এদিন সপোনক
এলেহুৱা নহʼল কিয় কুকুৰা?
কঁচাইজনে কʼব 'শিৰোনাম'ত
নিশাৰ শিলত নিভিজেই তাৰ সপোন!
প্ৰজন্ম
দিনৰ পিঠিত, আবেলিৰ চিঠিত
ভিন্নৰঙী চিয়াঁহীৰ কেনভাচ
দৰিকণা আশা, মাজনিশাৰ ভাষা
ৰৈ যায় আগন্তুক ঠাঁচ...
ভিন্নৰঙী চিয়াঁহীৰ কেনভাচ
দৰিকণা আশা, মাজনিশাৰ ভাষা
ৰৈ যায় আগন্তুক ঠাঁচ...
~এই মাহটো আপোনাৰ কেনেদৰে যাব~
ৰাজদীপ ফ্ৰেঙ্ক : আপুনি
এই মাহটো দাঁত উভলোৱাত ব্যস্ত থাকিব। পেপচুদেণ্ট খাই পেটৰ অসুখ হোৱাৰ প্ৰৱল সম্ভাৱনা আছে। ফেকবুকত ফ’টো
আপলোদ কৰাৰ প্ৰৱনতাত আঙুলিৰ বিষ হ্’ব পাৰে। শুভ জন্তু জিৰাফ্।
শুভ খাদ্য নাজানোঁ।
বিদ্যুত্… বৰদলৈ : আপোনাৰ
এই মাহত ভাত খোৱাৰ সম্ভাৱনা আছে। ৰুটিৰ খুৱাবলৈ কোনোবাই আঁকোৰগোজ কৰিলে গুলিয়াই দিব। অৱসৰ গ্ৰহনৰ পিছত
বিবাহ যোগ আছে। আগতিয়াকৈ হ’লে গুলিয়া-গুলি হোৱাৰ প্ৰৱল সম্ভাৱনা আছে।
নীতা নীলা : আপোনাৰ নীলা চুলিত উফি হ’লে
চোৰাটৰ পাতৰ লগত বান্দৰ কেঁকোৱা মিহলাই এমাহ লগালে সুফল পাব। সদৌ অসম আন্ত:ৰাষ্ট্ৰীয়
চেল্ফি প্ৰতিযোগিতাৰ বিচাৰিকা হোৱাৰ সম্ভাৱনা নুই কৰিব নোৱাৰি। শুভ দিন চেপ্টেম্বৰৰ
চেকেণ্ড চানদে।
~ আপোনাৰ সমস্যা, নাথুৰামৰ সমাধান ~
এঞ্জেল প্ৰিঞ্চেছ শূৰ্পনখা, পাৰ্লাৰনগৰ
সমস্যাঃ- মই মোৰ ফেচবুকৰ প্ৰ’ফাইল পিক্চাৰত যাকে-তাকে,
যধে-মধে যিমান টেগ কৰিলেও বেছি লাইক নাপাওঁ। লাইক বঢ়াবলৈ কিমান পূজা-পাতাল কৰিলোঁ,
কিমানৰ ফোটোত লাইক কৰিলোঁ, কিমানৰ ইনবক্সত plz lyk ma prof pic
বুলি লিখিলোঁ হিচাপ নাই; কিন্তু এতিয়ালৈকে কোনো সুফল পোৱা নাই। লাইক পাবলৈ একেখন ফোটোকে
দুই তিনিদিনৰ মূৰে মূৰে পুনৰ প্ৰফাইল পিক বনাওঁ আৰু কেতিয়াবা কমেণ্ট কৰিও ফোটোখন ওপৰলৈ
তুলি আনো, যাতে আনৰ নটিফিকেচনত আহে। তথাপিও বেছি লাইক নাপাওঁ। বৰ চিন্তাত পৰিছোঁ। উপায়
এটা দিব বুলি আশা কৰিলোঁ।
সমাধানঃ- আপুনি কি কম্পেনীৰ চিম কাৰ্ড ব্যৱহাৰ কৰে
নজনোৱা বাবে সমস্যাটোৰ সমাধান দিবলৈ অলপ অসুবিধা হৈছে। তথাপি কওঁ, আপুনি যদি ৰিলায়েন্সৰ
চিমৰ পৰা নেট কৰে তেন্তে ভোদাফোন নাইবা এয়াৰটেল ব্যৱহাৰ কৰি চাব পাৰে এণ্ড ভাইচ ভাৰ্চা।
নতুবা কেইটামান ফেক প্ৰ’ফাইল খুলি নিজেই লাইক কৰিব পাৰেছোন! দহটা ফেক প্ৰ’ফাইল খুলিলেও,
প্ৰতিটো প্ৰ’ফাইলৰ পৰা ৫০ বাৰকৈ লাইক কৰিলেও ৫০০ টা লাইক সহজতে আহি যাব।
অসম্ভৱ বেজবৰুৱা, গাওঁ- ইম্পচিব্লপুৰ
সমস্যাঃ- মোৰ ফেচবুক প্ৰ’ফাইলৰ পৰা ফ্ৰেণ্ড
ৰিকুৱেষ্ট নাযায়। এমাহৰ বাবে ব্লক কৰি থৈছে জুকাৰবাৰ্গ ভিনদেৱে। মোৰ স্বভাৱ-চৰিত্ৰ
ভাল বাবে হিংসাতে বহু বন্ধু-বান্ধৱীয়ে তেওঁলোকৰ ফ্ৰেণ্ডলিষ্টৰ পৰা মৰমেৰে গতা মাৰি
বাহিৰলৈ উলিয়াই দিছে মোক আৰু বহুতে ব্লকো কৰিছে। ফলত কাজিৰঙাৰ গঁড়ৰ দৰে দিনক দিনে
মোৰ ফ্ৰেণ্ডৰ সংখ্যা কমি আহিছে আৰু অসমৰ বানপানীৰ দৰে মোৰ টেনচন বাঢ়ি আহিছে। উপায়
এটা দিয়ক না।
সমাধানঃ- অপোনাৰ সমস্যা দেখিছোঁ গভীৰ। আপুনি এটা
কাম কৰিব পাৰে, ফেচবুকৰ যিকোনো গ্ৰুপত, পেজত, যোকোনো ষ্টেটাছ, ফোটো আদিত,
যাৰে-তাৰে ৱালত, ইনবক্সত, মুঠতে যতেই পাই তাতেই ‘এদ মি আই এম বলক’ বুলি লিখি চাব
পাৰে। বন্ধুৰ আড্ডাত, মেলে-মিটিঙে, সাংস্কৃতিক সন্ধিয়া, পূজা-সৱাহ ইত্যাদি যিকোনো
অনুষ্ঠানতেই য’তেই সুবিধা পায় তাতেই অকস্মাতে ডাঙৰকৈ চিঞৰি দিব ‘এদ মি আই এম বলক’
বুলি। পাৰিলে সকলো সময়তে মাইক এটা লগত লৈ ফুৰা ভাল। সদায় ৰাতিপুৱা শুই উঠাৰ আগত
আৰু ৰাতি টোপনি যোৱাৰ পিছতো ৩ বাৰকৈ চিঞৰিব। লগতে নিজৰ কপাল, গাল, হাত, ভৰি চবতে
গজনি খুড়াৰ নিচিনাকৈ লিখি ল’ব ‘এদ মি আই এম বলক’ বুলি। পাৰিলে বাক্যটোৰ শেষত
‘প্লিজ’ তিনিটামান আৰু :পি :পি, :ডি :ডি যি পাৰে চব লগাই দিব।
লাজকুৰীয়া ডেকা, নিলাজনগৰ
সমস্যাঃ- প্ৰকাশত অনিচ্ছুক।
সমাধানঃ- আপুনি ফেচবুক কৰিলে অনলাইন দেখুওৱাটো
স্বাভাৱিক। শৰীৰত সেউজীয়াৰ পৰিমাণ বাঢ়িলেও কেতিয়াবা চাত-বক্সৰ সেউজীয়া লাইটটো
অনবৰতে জ্বলি থকা দেখা যায়। গছ-গছনি কমকৈ খোৱা কৰিব। ৰাতি দুই বজালৈকে অনলাইন থাকি
বেলেগৰ লগত চেনী খাই থকা বাবে গাৰ্লফ্ৰেণ্ডৰ পৰা গৰু পিটন খোৱাটোত লাজ কৰিবলগা একো
নাই। প্ৰতিবাদস্বৰূপে অসম বন্ধ এটা দি চাব পাৰে, সুফল পাব। প্ৰেয়সীৰ চৰ-ভুকুত
চকু-মুখ ফুলি থকা বাবে মানসিক অশান্তিত ভুগিছে যদি বান্দৰ কেকোঁৱা আৰু চোৰাত পাতৰ
মিশ্ৰণ এটা তৈয়াৰ কৰি মূৰত ঘঁহিলে মানসিক শান্তি আৰু সুস্থিৰতা ঘূৰি আহিব।
ভাইৰাচ হাজৰিকা, লগআউট নগৰ
সমস্যাঃ- মই ছোৱালীবোৰক কিমান ‘হাই ডীয়েৰ’ বুলি
মেচেজ দিওঁ, ফোটোত ‘লুকিং নাইচ’, ‘চো বিউটিফুল
ডীয়েৰ’ জাতীয় কমেণ্ট দিওঁ, ইম্প্ৰেচন বঢ়াবলৈ ইংৰাজীত বুজি নোপোৱা ‘অসম্ভৱ চৰ্টকাট
ইষ্টাইল’ত ষ্টেটাচ আপডেট দিওঁ, পাৰ্ক কৰি থোৱা বেলেগৰ দামী দামী বাইকত ৰাতি চানগ্লাছ
পিন্ধি ৰনবীৰ কাপুৰৰ ইষ্টাইলত ফোটো উঠি প্ৰ’ফাইল পিক বনাওঁ। তথাপিও কোনোৱে মোক
পাট্টাই নিদিয়ে।
সমাধানঃ- আপোনাৰ সমস্যাৰ আঁৰত বিৰোধী পক্ষৰ হাত
থকা যেন অনুমান হয়। গেচ্ট্ৰিকৰ সমস্যাৰ বাবেও কেতিয়াবা এনেকুৱা হোৱা দেখা যায়। তথাপি
বিশেষ চিন্তা কৰাৰ দৰকাৰ নাই। এহ বাদ দিয়ক হে! মিছা কলে কিডাল হ’ব, হয়নে নহয়? আমেৰিকাতো অপোনাক কোনেও পাট্টা নিদিয়ে।
আপোনাৰো যদি কিবা সমস্যা আছে তেন্তে habathuri@jotetote.com লৈ মেইল কৰিব পাৰে।
ইতি,
নাথুৰাম
দাড়ি-কমাৰ ভুল
বৰ মৰমেৰে প্ৰেয়সীলৈ বুলি চিঠি এখন লিখিছিলোঁ। চিঠিখন পোৱাৰ
পিছতেই প্ৰেয়সীৰ সৈতে বিচ্ছেদ হ’ল মোৰ। বৰ
দুখ লাগি আছে হে! চেঃ! কি জানো হ’ল! চিঠিখন লিখিছিলোঁ এনেদৰে…
মৰ মৰ। মৰম ল’বা জংঘলী। বান্দৰ এটাৰ নিচিনা তোমাৰ মুখখন।
দেখিলে মোৰ হৃদয়ে হাই-জাম্প মাৰিবলৈ আৰম্ভ কৰে। তুমি মোৰ অতি মৰমৰ ছাগলী। বৰষুণত
তিতি বেমাৰী হোৱা তুমি। আৰু মই যে বৰষুণজাকৰ আনন্দ লোৱাৰ পণ লৈছিলোঁ তোমাৰ বাৰু
মনত পৰেনে? মই যে গৰু। বিহুৰ দিনা লগ পাইছিলোঁ তোমাক। তোমাৰ মা আৰু দেউতাক আমাৰ
ঘৰলৈ মাতি এইবাৰ এসাজ খুৱাম বুলি বুলি ভাবিছোঁ কুকুৰ। এটাই বাহিৰত ভুকি আছে তোমাৰ
দৰে। মোৰো মনত পৰি থাকে তোমালৈ, এনেদৰে ভবাটোও ভুল! মই তোমাক তিলমাত্ৰাও দেখিব
নোৱাৰোঁ।
ইতি,
তোমাৰ ****
ইতি,
তোমাৰ ****
পিছতহে বন্ধু এজনে সুধৰাই দিলে। আচলতে এনেদৰেহে হ’ব লাগিছিল
হেনো…
মৰমৰ,
মৰম ল’বা।
জংঘলী বান্দৰ এটাৰ নিচিনাকৈ, তোমাৰ মুখখন দেখিলে মোৰ হৃদয়ে হাই-জাম্প মাৰিবলৈ
আৰম্ভ কৰে। তুমি মোৰ অতি মৰমৰ। ছাগলীখেদা বৰষুণত তিতি বেমাৰ হোৱা; তুমি আৰু মই যে
বৰষুণজাকৰ আনন্দ লোৱাৰ পণ লৈছিলোঁ, তোমাৰ বাৰু মনত পৰেনে? মই যে গৰু বিহুৰ দিনা লগ
পাইছিলোঁ তোমাক! তোমাৰ মা আৰু দেউতাক আমাৰ ঘৰলৈ মাতি এইবাৰ এসাজ খুৱাম বুলি বুলি
ভাবিছোঁ। কুকুৰ এটাই বাহিৰত ভুকি আছে। তোমাৰ দৰে মোৰো মনত পৰি থাকে তোমালৈ। এনেদৰে
ভবাটোও ভুল যে মই তোমাক তিলমাত্ৰাও দেখিব নোৱাৰোঁ।
ইতি,
তোমাৰ ****
আপোনালোকেই কওকছোন বাৰু, দাড়ি-কমা আৰু ব্যাকৰণৰ সঠিক
ব্যৱহাৰ নজনাটো জানো মোৰ ভুল???
Subscribe to:
Posts (Atom)